引言
「教仔互動劇場」以有趣、誇張的戲劇手法，把普遍家長和教師所遇到的管教問題和處理方式呈現出來，期望能激起家長師表們的回心微笑，更望能贏得你們的積極回應，發帖與大家分享交流教仔心得。我們深信管教之道沒有必勝秘方，但若能開啟真誠互動的對談，家長也能從子女身上獲得成長啟迪。
青少年普遍崇拜偶像，尤其是樣貎俊美的影視明星，更是熱門崇拜目標，一言一行都受青少年注目。一些青少年迷戀偶像，不單會到明星出沒地點或活動舉牌支持，甚至會追到海外出席明星有份參與的活動，年前內地女Fans迷戀香港娛樂界「天王」而致傾家蕩產，更成為全城熱話。
如果孩子過份崇拜偶像或者「追星」，你會如何應付？希望你可以代入以下的教仔劇場，然後與大家分享心得。
教仔互動劇場
第一幕：家中
星期五傍晚，媽媽看到小玲在執拾帳幕、睡袋和衣物。
媽媽：小玲，你做咩執帳幕？你去露營咩？
小玲：唔…… 媽咪，我有件更重要o既野想同你講….
媽媽：咩事？咁緊張？
小玲：我想同小蔓去韓國旅行……？
媽媽：去韓國旅行？年初我地一家先至去過韓國喎，你仲話泡菜唔好食，韓國唔好玩，重成日匿係酒店睇電視……咁快又想再去？乜事呀？
小玲：因為….. 林山下個月去韓國舉行簽名會，我同小蔓想一齊去支持佢…..
媽媽：林山？香港果個明星林山？晚晚睇住佢套電視劇送飯，成間房貼滿o西佢o既海報重唔夠，一放假又去電視台等佢，仲要追埋去韓國？唔得！女仔之家，俾人知道笑死人呀！
小玲：媽媽……求你俾我去….. 我想去支持林山啊…..
媽媽：（語氣兇惡）唔去得韓國！俾你去露營啦。（語氣回復較為平和）係啦，你執帳幕係咪去露營呀？
小玲：同小蔓一齊去．．．．去星河廣場…..
媽媽：吓？星河廣場？購物商場露營？
小玲：星期日林山o係星河廣場舉行簽名會，排第一位可以錫佢一啖，所以我一陣就出發去霸頭位！
媽媽：（十分驚訝）吓？為左佢去露宿兩晚？你激死我喇！讀書又唔見你咁勤力，唔准再追星，唔准再迷偶像！以後唔准再去電視台呀！
小玲：（大喊大叫）你咁老餅你咩都唔識咩都唔明！
媽媽：你有胆去，以後我唔再俾錢你駛！
小玲：唔俾咪唔俾囉，我自己搵嘢做，自己靠自己！(跑出去)
小玲的追星行動受阻，因此大發脾氣，兩媽女自此關係變差。如果你是媽媽，你會怎樣處理? 請你在討論特區內發表帖子，與大家分享。
