引言
「教仔互動劇場」以有趣、誇張的戲劇手法，把普遍家長和教師所遇到的管教問題和處理方式呈現出來，期望能激起家長師表們的回心微笑，更望能贏得你們的積極回應，發帖與大家分享交流教仔心得。我們深信管教之道沒有什麼是必勝秘方，但若能開啟真誠互動的對談，家長也能從子女身上獲得成長啟迪。
適當的好勝心可以令孩子敢於面對挑戰和積極向上，對日後成長有正面影響；但如果好勝心太強，可能令孩子日後不能承受挫折，或者變得驕傲和容易看輕別人。所以，家長應正確處理孩子的好勝心理。
如何令孩子培養適當的好勝心，既不會因太好勝而引發其他問題，但又能夠推動他們不斷努力進步？希望你可以代入以下的教仔劇場, 然後與大家分享心得。
教仔互動劇場
好勝
第一幕：家中
仲明是學校足球隊成員，一直希望成為威風八面的前鋒兼隊長。為了爭取校際比賽時擔任隊長，證明自己的球技勝過其他隊友，他每日放學便到球場埋首苦練，連功課和學業都置諸不理。
媽媽A說：「有書你又唔讀，淨係掛住踢波！你又唔係踢得叻，仲發咩夢做隊長？就算叻過o西隊友又點？日後你讀唔成書，搵唔到食，邊個可憐你？以後唔準再踢波，快d返屋企讀書！」
*仲明為了勝過隊友和當上隊長，只顧練波以致荒廢學業，如果你是媽媽A，你會怎樣幫助他? 請你在討論特區內發表帖子, 與大家分享。
第二幕：校內
仲明的球隊通過了校際比賽的初賽, 但仲明在比賽時只顧自己「個人表演」和出風頭, 賽後反而埋怨隊友技術不佳, 於是雙方展開罵戰, 教練於是對他們訓話。
教練A說：「仲明你唔夠勁就咪咁獨食!俾對方幾個人mark住都淨係掛住自己夾硬射, 又唔交波俾人!抵你俾隊友抵制！又冇心機練波, 仲夠膽走去染髮扮靚而唔習訓!你當自己係明星? 你咁o既料想做碧咸？平日有冇照鏡呀？越睇你越唔順眼，我依家燉你冬菇，是旦俾阿貓阿狗做都好過俾你做！」
*仲明為了出風頭和勝利，既自私也忽略了合作精神，也破壞了和隊友之間的關係。如果你是教練A，你會怎樣幫助他? 請你在討論特區內發表帖子, 與大家分享。
第三幕：球員休息室
終於到了總決賽，仲明太重視勝負，在下半場時刻意踢傷對方主力球員，結果被判罰。中場休息時,教練會說甚麼？
教練A說：「你有咁搞錯! 咁樣剷跌人都得? 輸12碼點算? 咁大動作做得咁明顯, 個個都睇到o西la! 要陰濕d, 踢左人地都唔可以俾球證睇到!記住, 只要贏波就用咩手段都得, 但要做得乾手淨腳! 下次要踢人可以咁樣咁樣……」
*仲明為了勝出而不惜犯規甚至傷害他人，破壞了體育精神。如果你是教練A，你會如何回應? 請你在討論特區內發表帖子, 與大家分享。
第四幕：家中
仲明的球隊終於在比賽中落敗，令他十分灰心, 不單打算退出球隊, 而且放棄一直喜愛的足球。
爸爸A說：「你有冇搞錯，練左咁耐波都會輸？我叫埋咁多親戚朋友一齊入場睇波，點知輸左，搞到我好冇面！你冇鬼用架！踢波又輸，讀書又唔叻，生舊叉燒好過生你！」
*仲明因為遇到挫敗而灰心。如果你是爸爸A，你會如何幫助他面對挫折? 請你在討論特區內發表帖子, 與大家分享。
如果四幕劇中的家長和教練, 改變對待仲明的態度, 仲明的結果又會如何?
假如仲明的生命有take 2又會如何?請click入討論特區中的四幕劇變奏版, 一起看看有甚麼轉變, 以及發帖一起討論。我們還提供了溫馨教仔提示給大家參考。
