前言
「教仔互動劇場」以有趣、誇張的戲劇手法，把普遍家長和教師所遇到的管教問題和處理方式呈現出來，期望能激起家長師表們的回心微笑，更望能贏得你們的積極回應，發帖與大家分享交流教仔心得。我們深信管教之道沒有什麼是必勝秘方，但若能開啟真誠互動的對談，家長也能從子女身上獲得成長啟迪。
現今的社會鼓勵消費，報章雜誌和電視上的廣告和商品介紹琳瑯滿目，很容易令孩子對物質和金錢的慾望不斷增加；父母要從孩子小時候便灌輸適當的價值觀，加上自己的身教，才可抗衡消費和物質文化，幫助孩子避免過強物慾．以及培養節儉品格和正確的價值觀和理財觀念。
如何避免孩子有過強的物慾，或者太重視金錢和物質？希望你可以代入以下的教仔劇場，然後與大家分享心得。
教仔互動劇場
物慾
第一幕：家中
穎芝這個學期考獲全級第三，成績比去年大有進步，於是媽媽決定獎賞一下穎芝。
穎芝說：「媽咪，我考得咁好，一定要買禮物送俾我呀！」
媽媽A說：「穎芝，你今次考得好好！繼續努力，日後就可以入大學做醫生，搵好多好多錢！媽媽決定獎你！你想要咩？靚衫？玩具？…. 」
穎芝說：「我要遊戲機.,…. 唔好…… 不如都係要…..」
媽媽A說：「我都費時諗，不如折現！嗱，上次你進步左三名，我獎左你五百蚊，呢次你進步左六名，我獎你一千蚊！你自己鍾意買咩就買咩！」
穎芝說：「我下次要考第一，考第一……」
媽媽A說：「好，下次你考第一，我獎你二千蚊！」
媽媽心滿意足。怎知事與願違，穎芝只考到第二，失落了獎金，信心大失，情緒不能平復，成績不斷下降，怨天尤人。
*穎芝學業成績有進步，媽媽以金錢獎賞她，無意間令穎芝對物質和金錢的慾望提升了。如果你是媽媽A，你會怎樣做? 請你在討論特區內發表帖子，與大家分享。
第二幕：玩具店內
穎芝和媽媽上街，在玩具店內看到「全球限定版B女」公仔，很希望可以買回家，甚至不惜當街大哭和發脾氣，為要「扭」媽媽就範。
穎芝說：「我要…..我要…..我一定要呢個……」
媽媽A說：「穎芝！點解你次次去街都要扭買野？上次我獎左一千蚊俾你，早兩日你咪自己去買左一大堆玩具囉，點解咁快又要買？嘩．．．呢個公仔要成三千蚊？好喇好喇，街上個個都望住我地喇，當我買你怕！我最唔鍾意人地扭計，你即刻收聲，一收聲我就買埋呢個公仔俾你！」
*穎芝以扭計方式要求媽媽買玩具，如果你是媽媽A，你會怎樣做? 請你在討論特區內發表帖子，與大家分享。
第三幕：外婆家中
穎芝探訪外婆，為外婆搥背和清潔家居，之後竟然向外婆索取服務費，說要儲錢買另一個限定簽名版B女。
穎芝說：「婆婆呀，清潔好辛苦 o架！我要收人工呀！」
外婆A說：「好，婆婆俾錢你都得，你做好d，咁我俾錢你買公仔玩。」
媽媽A說：「穎芝！咁細個就有生意頭腦，醒目！記住做人唔好蝕底，你自己賺到錢自己買野，阿媽唔會阻止你！不如咁，你幫我做家務，我照計番錢俾你，洗一次碗20蚊，掃一次地25蚊……」
*穎芝以做家務作為賺取金錢的方法，價值觀被扭曲了。如果你是媽媽A，你會怎樣幫助她? 請你在討論特區內發表帖子，與大家分享。
第四幕：校務處
穎芝為了想買自己喜歡的玩具，在校內偷取同學的金錢，因此被記大過，而且要見家長。
媽媽A說：「上兩個月買左個幾千蚊B女之後，我咪講過我唔會再買任何玩具俾你囉！之後你扭一次，我就鬧一次，鬧左你咁多次你都仲想要？我唔買俾你，你就偷？依家屋企冇錢咩？搞到要見家長，我冇o西面喇！我今日原本仲約左你一班 Auntie去shopping掃貨，搞到我冇時間去！以後更加唔駛旨意我買玩具俾你！」
*穎芝希望獲得金錢滿足物慾，遭家人拒絕後，無法可想，最後竟然偷取同學的金錢。如果你是媽媽A，你會怎樣幫助她? 請你在討論特區內發表帖子，與大家分享。
如果四幕劇中的家長改變對待穎芝的態度，穎芝的結果又會如何?
假如穎芝的生命有take 2又會如何?請click入討論特區中的四幕劇變奏版, 一起看看有甚麼轉變, 以及發帖一起討論。我們還提供了溫馨教仔提示給大家參考。
