引言
「教仔互動劇場」以有趣、誇張的戲劇手法，把普遍家長和教師所遇到的管教問題和處理方式呈現出來，期望能激起家長師表們的回心微笑，更望能贏得你們的積極回應，發帖與大家分享交流教仔心得。我們深信管教之道沒有什麼是必勝秘方，但若能開啟真誠互動的對談，家長也能從子女身上獲得成長啟迪。
孩子做功課或者做事輕率而粗心大意，可能是一時因為外來事物而分心，也可能是他們已經養成了馬虎做事的習慣和得過且過的心態；萬一這種「求其、是旦」的輕率心態變成了常態，對他們日常生活、學習和日後工作都會有很大影響。若要避免孩子日後成為「馬虎先生」和「馬虎小姐」，家長要循循善誘，甚至可能要施予適當壓力，幫助他們逐步培養謹慎和負責任的做事態度。
如何避免孩子做事馬虎，培養細心和謹慎的態度？希望你可以代入以下的教仔劇場，然後與大家分享心得。
教仔互動劇場
粗心大意
第一幕：家中
星期六下午，智民正在家中做數學科功課。
智民：「媽咪！我唔駛10分鐘就做左3版數學題，係咪好快呢？..」
媽媽A：「係好快，但係老師上次話你好唔小心，做錯多過做啱喎！」
智民：「是旦喇，總之有功課交咪得囉！冇做或者做唔哂就話罰留堂o者，寫錯答案又唔駛留堂！」
媽媽A：「禮拜一要交幾多版數學題？依家做完未？我一陣去街，你想唔想去？快啲做啦！」
智民：「好似要做…..4版數學題掛….. 定係6版呢？唔記得喺手冊寫低添….」
媽媽A：「咁即係未做完喇？咁快啲做喇，你快啲做完，我快啲同你去街！」
智民：「好野！有街去，等我用最快速度做埋啲功課先！」
*智民只求盡快完成功課，因此計算數學題時輕率大意，以致錯誤連篇，甚至連要做多少版也忘掉。如果你是媽媽A，你會怎樣幫助他? 請你在討論特區內發表帖子, 與大家分享。
第二幕：家中
智民終於完成功課，媽媽準備和他外出。
智民一邊望著電視，一邊大叫：「媽咪，換好衫未？你咁慢o架！」
媽媽A(在房間內答)：「我就快得喇，你著好哂衫未？」
智民：「一早著好，一路睇電視一路等左你好耐喇…….」
媽媽A(行出房間看見智民)：「著好？你睇下件衫，扣錯鈕，再睇你自己對腳！左腳白襪右腳黃襪，最離譜係對鞋，左腳波鞋右腳皮鞋！」
智民：「咦，係喎！」
媽媽A：「怕左你! 你坐係度繼續睇電視，等媽咪幫你搵番對鞋同對袜然後幫你著番！」
*智民做事不專心，因為顧著看電視而分散了注意了，連整理自己的衣服鞋襪也出錯，如果你是媽媽A，你會怎樣幫助他? 請你在討論特區內發表帖子, 與大家分享。
第三幕：餐廳內
智民做完功課後，媽媽和智民外出，然後用膳。
智民（揚起手上的遊戲機）：「媽咪咁錫我，又帶我去街又買遊戲機俾我，媽咪我錫o西你！」
媽媽A：「今晚你咁乖呀？行動最實際！」
智民：「吓？咩行動？我最怕洗碗抹枱果d野o架喎……」
媽媽A：「都係我地個個縱壞o西你，搞到你咁驕生慣養！」
智民 (撒驕，然後繼續玩遊戲機)：「咦…………………..媽咪呀……………….」
媽媽A：「今晚我地嚟餐廳食飯，駛乜洗碗呀！我依家去洗手間，一陣侍應攞我碗湯同奶茶嚟，你幫我落糖落鹽喇！」
智民(繼續玩遊戲機)：「好呀，冇問題！」
(媽媽A行開後，侍應捧湯及奶茶到來)
智民(拿開手上的遊戲機)：「咁難玩，又game over！快啲同媽咪落糖落鹽先…. 咦，邊包係糖包係鹽….. 是旦喇….」
(智民將兩包白色粉末分別落於湯及奶茶內。媽媽A回來後拿起奶茶喝一口)
媽媽A (噴出一口奶茶)：「嘩，啲奶茶咁咸，你係唔係落左鹽？咁啲湯…(試喝一口)…啲湯咁甜，梗係落左糖喇？你咁大個仔，連鹽同糖都未識分…... 怕左你！好在平時係屋企我冇叫你洗碗，我怕你一洗碗連膠腕都洗爛呀！」
智民：「haha，媽咪，你下個月同老豆去日本旅行，買啲洗唔爛o既超合金碗咪得喇….係喎，你地去旅行，到時我點算？」
媽媽A：「我早知你咁驕生慣養，我梗係叫定阿姨來照顧你喇…..」
智民的家人一向對他過份照顧，令他產生依賴心態，引致自理和做事能力差。如果你是媽媽A，你會怎樣幫助他? 請你在討論特區內發表帖子, 與大家分享。
第四幕：校務處內
智民回校後，才發現自己漏做了兩版數學題，於是借同學的功課抄，最後被老師發現。
老師A：「陳智民，你抄左第4同第5版o既答案落第6同第7版度，所以全部錯哂，我先至咁易發現你抄功課！咁開頭幾版呢？唔駛問又係抄返嚟o架喇？」
智民：「我只係漏左最後兩版……頭幾版係我自己做o架… 」
老師A：「你叫我信你？點解我要信你？你仲值得我信你咩？你平時做野咁求其是旦，連抄功課都抄錯，冇得救冇前途o架喇 你！」
智民：「對唔住呀老師….不過…」
老師A：「我依家趕時間，費事再理你!記你一個缺點，你自己返屋企喇！」
智民為了掩飾自己漏做功課，竟然抄功課。如果你是老師A，你會怎樣幫助他? 請你在討論特區內發表帖子, 與大家分享。
如果四幕劇中的家長和老師改變對待智民的態度，智民的結果又會如何?
假如智民的生命有take 2又會如何?請click入討論特區中的四幕劇變奏版, 一起看看有甚麼轉變, 以及發帖一起討論。我們還提供了溫馨教仔提示給大家參考。
