引言
「教仔互動劇場」以有趣、誇張的戲劇手法，把普遍家長和教師所遇到的管教問題和處理方式呈現出來，期望能激起家長師表們的回心微笑，更望能贏得你們的積極回應，發帖與大家分享交流教仔心得。我們深信管教之道沒有什麼是必勝秘方，但若能開啟真誠互動的對談，家長也能從子女身上獲得成長啟迪。
孩子不懂禮貎，不單會令父母覺得尷尬，更可能孩子社交能力較弱或難以與其他人相處，甚至會發展為過於自我中心及不尊重他人。要讓孩子懂得禮貎，最重要是家長以身作則，以及在生活中把握鍛練及講解的機會，必定可以讓孩子成為懂得待人處事、尊重別人的有禮孩子。
如何培養孩子的禮貎和懂得尊重別人？希望你可以代入以下的教仔劇場，然後與大家分享心得。
教仔互動劇場
第一幕：電梯內
爸爸帶麗恩上街，一入電梯便遇到住在樓上的林uncle。
爸爸:咦，老林，咁啱o既？你又去街呀？麗恩，叫林uncle 喇。
麗恩: (望一望爸爸和林uncle，然後低頭)
爸爸: 喂, 快啲叫！
麗恩: (仍然低頭，沒有開聲，躲在爸爸背後)
爸爸:你唔叫人，咁冇禮貌，我以後唔錫你！
麗恩: (細細聲)我都唔識佢……..
林uncle (開始面露尷尬表情)：唔緊要la……佢好少見到我，所以可能怕生寶….
爸爸: (沒理會林uncle)唔識都要叫，快啲叫！如果唔係我罰你以後唔准再打機！
麗恩:仍然低下頭, 以不情願的微弱聲線叫)林uncle。
爸爸: (開始發火)你同個地板講野呀? 林uncle係個地板呀? 快啲望住人地叫！仲要大聲啲叫!
麗恩: (緩慢但仍然不情願地抬頭, 望一望林uncle ，以略細於正常聲線叫): 林uncle…..
爸爸: 我仲係聽唔到!再大聲啲!
麗恩: (望住林uncle, 以略大於正常聲線叫)林. Un. cle!
林uncle：(尷尬)乖la…..
爸爸:老林，我個女咁失禮，唔好意思。
林uncle：(好尷尬)唔緊要。咦，lift到la, bye bye。
*麗恩不會主動和人打招呼，甚至會躲在父母背後。如果你是爸爸，你會怎樣幫助她? 請你在討論特區內發表帖子, 與大家分享。
第二幕：港鐵車箱中
爸爸：醒目女，頭先架車一開門，你就衝入車箱霸住兩個位，真係醒目！
麗恩：梗係喇！爸爸媽媽次次搭車都霸到位，我成日跟住你地搭車去街，梗係學到野喇！不過頭先真係好驚險，我前面咁多人，但車廂內得番兩個位，我數過喇，我頭先推開左3個婆婆、4個公公、2個大隻佬同埋5個師奶先至霸到呢兩個位啊！
爸爸：呢啲做「虎父無犬女」囉！
麗恩：我一路推開佢地, 一路記著爸爸教我唱「衝啊衝，快衝鋒！坐啊坐，坐它吧！（望一望前面）咦，頭先俾我推開o既其中一個阿婆行緊過o黎！死喇，佢會唔會鬧我o架？
爸爸：唔怕，我地垂低頭扮訓覺，咁咪可以唔理佢o羅！
麗恩：爸爸真係醒目，我要學爸爸咁叻！
麗恩在耳濡目染之下，學到從後推開別人、霸位等不良態度和行為。如果你是爸爸，你會怎樣幫助她? 請你在討論特區內發表帖子, 與大家分享。
第三幕：港鐵月台
麗恩和爸爸到站了，在港鐵月台時，麗恩張開雙手「打喊路」，無意中撞到身後的乘客，碰跌了對方手上的東西。
麗恩：(發覺碰到人，轉頭望他，沒有道歉，一邊看一邊偷笑)爸爸，你睇下，果個女人件衫好老土，著到佢成隻香蕉咁樣！
乘客：(有點不滿，但又不便發作，所以拿起跌在地上的東西後快步離開)
爸爸：你咁冇禮貎，點可以咁樣當住你地面笑人o架？俾人地聽到點算？你咁失禮，咁冇用，話極都唔聽，冇得改o架喇，成日都係咁o架喇，我以後唔再帶你去街，費事你失禮我!
麗恩在公共場合取笑別人，令爸爸尷尬。如果你是爸爸，你會怎樣幫助她? 請你在討論特區內發表帖子, 與大家分享。
第四幕：在爸爸的朋友家中
爸爸帶麗恩來到朋友家，按門鐘後，爸爸的朋友Chris應門。
Chris：老張，快啲入來喇！
爸爸：唔該Chris！麗恩，快啲叫Chris哥哥！
麗恩：吓?哥哥？
爸爸：快啲叫Chris哥哥！
麗恩：(不情不願地叫) 但佢明明係叔叔喎！
Chris：(有點尷尬)
爸爸：(有點尷尬)．．．哦，佢未結婚，未結婚都叫哥哥！
麗恩：舅父都未結婚，我係咪都要叫佢哥哥？
爸爸：(有點尷尬)．．．．．．哦．．． (想轉變話題) 咪咁多事，快啲入屋先！(在麗恩耳邊講了一番話，之後麗恩面露笑容並點頭)
Chris：麗恩想飲啲咩啊？橙汁定汽水？
麗恩：我想要橙汁，唔該！
Chris：唔駛唔該。麗恩真係有禮貎。
麗恩：(望著爸爸，攤開手板) 錢呢？你頭先話，如果我有禮貎咁打招呼，你就會俾$100蚊我喎！
爸爸：嗱，俾你喇！要你有禮貎真係唔容易，我要付出好大代價……
麗恩：好野！
麗恩希望以有禮貎的行為和態度換取金錢。如果你是爸爸，你會怎樣幫助她 請你在討論特區內發表帖子, 與大家分享。
如果四幕劇中的家長改變對待麗恩的態度，麗恩的結果又會如何?
假如麗恩的生命有take 2又會如何?請click入討論特區中的四幕劇變奏版，一起看看有甚麼轉變, 以及發帖一起討論。我們還提供了溫馨教仔提示給大家參考。
